Yer, qiyamət günü insanın əməllərinə şahidlik edəcəkdir

TEHRAN (IQNA) - Din və təfsir kitablarında qeyd olunanlara əsasən, axırəz-zaman və qiyamətin əlamətləri vardır. Bunlar arasında böyük zəlzələ və ölülərin dirilməsi də vardır. Bu dövrdə insan öz işlərini görür və yer üzü insanın gördüyü işlərə şahidlik edir.

Qurani-Kərimin doxsan doqquzuncu surəsi “Zilzal” adlanır. 8 ayədən ibarət bu surə 30-cu cüzdə yerləşdirilmişdir. "Zilzal" surəsinin Məkkə və ya Mədinə surəsi olması ilə bağlı fikir ayrılığı var. Lakin təfsirçilərin əksəriyyəti onu Mədinə surəsi hesab edirlər. Bu surə İslam Peyğəmbərinə (s) nazil olan doxsan üçüncü surədir.

Bu surədə yerin son zəlzələsindən və Qiyamətin əvvəlində dünya nizamının dağılmasından bəhs edilir. “Zizal” sözü bu surənin birinci ayəsində qeyd olunan silkələnmə və zəlzələ mənasındadır.

“Zilzal” surəsində qiyamətin əlamətlərindən və hər bir yaxşı və pis əməlin dünya əməllərinin nəticəsini həmin gün görəcəyindən bəhs edilmişdir.

"Zilzal" surəsinin üç əsas mövzusu var: 1. qiyamət gününün başlanğıcının əlamətləri; 2. İnsanın gördüyü işlərə qiyamət günü yer şəhadət verəcək; 3. İnsanları yaxşı və pis insanlara bölür və hər kəs öz əməlinin mükafatını və ya cəzasını alacaq. Həmçinin bu surədə Allah qiyamət günü imtahanın dəqiqliyini, sərtliyini və ədalətli olmasını vurğulayır.

Bu surənin ikinci ayəsində deyildiyinə görə, qiyamətin əlamətlərindən biri də bu zəlzələlər səbəbilə yerin öz yükünü boşaltmasıdır. Şərhçilər hesab edirlər ki, “yerin yükləri” torpağa basdırılmış ölülərdir.

Bu surənin axırıncı üç ayəsində insanın əməllərinin qiyamət günü cism şəklində zühur edəcəyi bildirilir. Bu o deməkdir ki, insan əsərləri ona uyğun şəkildə təqdim olunur və onları görmək xoşbəxtlik və ya əziyyətə səbəb olur.

Bu surənin yeddinci və səkkizinci ayələrində buyurulur: "Kim (dünyada) zərrə qədər yaxşı iş görmüşdürsə, onu (onun xeyrini) görəcəkdir (mükafatını alacaqdır). Kim də zərrə qədər pis görmüşdürsə, onu (onun zərərini) görəcəkdir (cəzasını çəkəcəkdir)". “Misqal” ağır çəki miqdarı, “zərrə” sözü isə havada səpələnmiş ən kiçik qarışqa və ya hissəciklər deməkdir. Əlbəttə, bu gün atoma da zərrə deyirlər. Təfsirdə deyilir ki, “onu görəcək” sözündən məqsəd “işin nəticəsi” və ya “əməl dəftəri” və ya “işin özü” deməkdir. Ona görə də insan qiyamətdə öz əməllərini görəcək.